عملت له بلوك .. !!

 عايز احكى موقف مهم حصل معايا .. 🤔🤔

واعتقد بيحصل مع ناس كتير .. قصة بسيطة لكنى ها حكيها بالادراك الروحى اللى واصلنى وعارف انها ها تفرق مع حد ..

من شوية .. لاقيت واحد عاملى follow .. ودخل يتابع كذا بوست .. وعمل likes .. كذا اعجاب يعنى ..

دخلت بصيت على صفحته .. لاقيتها كلها نجاسة بشكل رهيب .. صور اباحية كتير وكاتب عمرى ضايع منى .. دخلت للصفحة لاقيت الموت والعفونة والارواح الشريرة بيتجولوا براحة ورفاهية جواها ..

ببساطة عملت له block .. يعنى اغلاق تام للتواصل بينى وبينه 👉👉

خلى بالك .. الانسان العادى بيبحث عن مجد نفسه .. ولذلك ابليس بيلاقى دخلة سهلة له وبيطرحه ارضا وبيدمره تماما ..

شباب وبنات كتير وخدام للاسف .. وبرضه مش كلهم اكيد .. بيحطوا صور تشد الانتباه لنفسهم لأجسامهم .. و لمؤتمراتهم او خدماتهم او برامجهم التليفزيونية .. وبيسيبوها للعامة مش للاصدقاء .. وكأنهم فى تحدى يلموا اكبر عدد متابعين وأصدقاء ..

وتلاقى كمية ناس مليانين نجاسة رهيبة وشر وظلمة بيتابعوهم .. وبيكتبوا لهم تعليقات ورمز حب واعجاب ..

وهما مستمتعين خالص وكل كام يوم ينزلوا صورة جديدة علشان تجيب ١٠٠٠ لايك .. !!

عايز اصدمكم بهذه الحقيقة .. يشوع جاله ناس يبانوا غلابة وتعبانين .. وبيقولوا له .. احنا خايفين منك ومن شعبك .. ارتاح وفرح وحس بالمجد .. ال followers .. او المتابعين كتار .. وقالهم ماشى تمام مش ها نيجى جنبكم ..

اتفاجىء بإن الرب بيقوله .. انت انخدعت ودول شعب كبير وقريب من ارضك مش بعيد وقوى مش ضعيف .. وبعد فترة قاله ادخل حرب علشانهم كمان لانك وعدتهم بإنهم ما يتأذوش .. !!

داود لما قرر ينفتح ويبص من فوق قصره على المرأة اللى بتستحم .. زنى وقتل وجاب عار لنفسه ولبيته ..

خلى بالك كل موافقة انت بتعملها على حاجة او شخص من الظلمة هى علاقة وتعاهد .. وما حدش ها يحميك منه .. كل نجاسة للناس دى او شر .. ها تدخل على حياتك حتى لو ما فاتحتش صفحتهم .. او ما اتواصلتش معاهم كتير ..

لانك بتدور على مجدك .. علشان كدة " ايخابود " زوال مجد الله .. ها يكون فى انتظارك .. وها تتكبد خسائر فادحة .. من نجاسة وحزن ويأس واحباط وانت مش عارف ليه ..

الاجابة مادام وافقت بيهم .. يبقى اللى ليهم ليك .. كل شرهم ليك .. وافرح بقى بمجدك مع نفسك .. لان مجد الله مش معاك ..

يارب احمينا من شر الذات .. ومن مكايد ابليس .. فى اسم يسوع .