ايخابود عندما يزول مجد الرب ..

 امرأة فينحاس ابن عالى الكاهن اول ما سمعت خبر اخد التابوت العهد الى الفلسطنيين وموت زوجها واخوه ورئيس الكهنة نفسه .. مخاضها جيه قبل وقته .. واطلقت على الطفل اسم " ايخابود " يعنى زال المجد ..

ناس كتير .. وخدام كتير .. وكنائس كتير .. وطوائف كتير .. بيجتازوا حالة ايخابود وهما مش عارفين ..

عارف يعنى ايه انك تكمل حياتك من غير ما يرافقك مجد الله .. ؟؟ 👉👉

- يعنى تدخل حروبك المعتادة وتنهزم فيها من عدوك بكل سهولة .. من ابسط ضرباته .. لان الرب مش مرافق ليك زى كل مرة ..
تمام زى كسرة اسرائيل قدام مدينة صغيرة جدا اسمها "عاى" على الرغم من انهم كانوا لسة محطمين العملاقة " اريحا " ..

- يعنى رموز حضور الرب المادية تتأسر وتتاخد من قدام عينيك .. يعنى تابوت العهد يتاخد او اوانى بيت الرب او حوائط الهيكل النحاس او الهيكل ينهدم او أورشليم اسوار تدمر .. وده حصل فى عصرنا فى اماكن ومع اشخاص كتير ..

- يعنى رموزك الدينية والقادة او الاشخاص اللى بتعتمد عليهم يختفوا فجأة بظروف غريبة او ينسحبوا فجأة من المشهد .. زى " عالى " رئيس الكهنة اللى وقع على رقبته واتكسرت ومات .. وابنائه حفنى وفينحاس .. ماتوا فى الحرب ..

دور فى التاريخ الحالى ها تلاقى مشاهد كتير بتتكرر حواليك ..

وده بيحصل ببساطة .. 👉👉
- بمجرد ما تحاول انك تسخر الرب فى خدمة اهدافك .. يعنى داخل الحرب او الخدمة او المؤتمر .. ومجمع شعب حواليك بإسم الرب او بتابوت عهده .. وانت مش خاضع له ولا طالب مجده .. انت بتعمل شووو وبتزود رصيد فخر نفسك على حساب الرب ..

- وبيحصل لو راعيت اثم او خطية فى قلبك وسيبتها تكبر .. وانت متصور ان عادى كدة كدة ها تنتصر ..
شمشون اتأسر وفقد عينه وبقى زى الحيوانات لانه قرر يزنى وقرر يرتبط ببنت برة شعبه وده استهانة بوصايا الرب ..

المزامير ٦٦ : ١٨
إِنْ رَاعَيْتُ إِثْمًا فِي قَلْبِي لاَ يَسْتَمِعُ لِيَ الرَّبُّ.

- انك ترفض قوانين الرب وتبدأ تعوج المستقيم بدون اطاعة لصوته .. عالى رئيس الكهنة كان عارف ان اولاده بياخدوا رشوة وبيعوجوا الحكم وبيعملوا مصايب رهيبة .. وما كانش بينذرهم ..

صموئيل الاول ١٥ ..
٢٢فَقَالَ صَمُوئِيلُ: "هَلْ مَسَرَّةُ الرَّبِّ بِالْمُحْرَقَاتِ وَالذَّبَائِحِ كَمَا بِاسْتِمَاعِ صَوْتِ الرَّبِّ؟ هُوَذَا الاسْتِمَاعُ أَفْضَلُ مِنَ الذَّبِيحَةِ، وَالإِصْغَاءُ أَفْضَلُ مِنْ شَحْمِ الْكِبَاشِ. ٢٣لأَنَّ التَّمَرُّدَ كَخَطِيَّةِ الْعِرَافَةِ، وَالْعِنَادُ كَالْوَثَنِ وَالتَّرَافِيمِ. لأَنَّكَ رَفَضْتَ كَلاَمَ الرَّبِّ رَفَضَكَ مِنَ الْمُلْكِ".

القصة طويلة جدا والكلام فيها اكبر من كدة بكتير .. خدمات فشلت وكنائس اتدمرت ومجامع وطوائف بتنهار وبتتفكك وكذلك دول .. بسبب " ايخابود "

والفاهمون يضيئون ..

يارب ادينا نتمسك بمجدك وليس مجد ذاتنا .. لتكن انت رأسنا وإلهنا بكل ما تعنيه الكلمة ..

احفظنا من عار مجدنا الشخصى .. اجعل قلوبنا على طرقنا لكى لا نفقد رجاء دعوتنا فى مشاركة مجدك الابدى .. لكى لا نفقد متعة معاينة انوار ووقائد عرشك الابدى .. فى اسم يسوع