الرب يملىء افواهنا بحقه واعلانه للتحرير - رؤيا روحية ..

 

 

من فترة كنت بصلى وشوفت رؤية ..

شوفت ان فيه ناس فيه منهم متجمعين مع بعض .. وفى منهم قاعد لوحده ..

كلهم بالاجماع كانوا فى حالة من الالم الفظيع .. مرميين فى الارض وفى منهم اللى بيصرخ بألم رهيب يشبه المغص الشديد .. وناس تانيين ايدهم على وشهم وبيبكوا بحرقة ومرارة رهيبة وندم وخوف ووجع .. وناس تانيين برضه بيبصوا لجسمهم وبيصرخوا ومش عارفين مصدر وجعهم فين ..

كلهم كانوا متحاوطين بغيوم بتتحرك تشبه الدخان الاسود الكثيف جدا .. وبتتحرك كأنها اعصار حواليهم وهما جواه ..

غيوم سودا ليها كثافة رهيبة وصوتها مزعج كأن فيه ارواح شريرة صوت زعابير مع صوت كائنات كأنها بتتكلم بكلام غير مفهوم .. بصوت غليظ خشن ومخيف صوت ما سمعتهوش قبل كدة ..

والرب كان بيكلمنى فى روحى .. ان الناس دول محاصرين بمخاوف وبأرواح بتحكم على حياتهم بالهلاك .. وتملاهم بخوف وفزع دائم ..

شوفت فى روحى .. ناس بتبكى فى غرفها .. وعلى سرايرها .. ناس قربت تنتحر ومترددة .. ناس اوهام ملياهم ومش شايفين اى حاجة صح .. ناس تانيين مليانين حقد وكراهية وشر وتدمير لكل حاجة حواليهم ..

والرب كان بيقولى ابليس حاكم قبضته عليهم .. محاصرهم بإعصاره .. ومخليهم خايفين او مش عايزين او مش لاحقين يشاركوا حد علشان يبلغهم بأخبار الخلاص ويساعدهم ..

لكن فجأة شوفت ناس واقفين من بعيد وبدأوا يفتحوا أفواههم ناحية الاعاصير الشريرة اللى محاوطة الناس .. وكأنهم بيندهوا محاوطين افواههم بإيديهم ..

وفى اللحظة دى .. خرجت من أفواههم اشعة نور كأنها حزمة عملاقة من الليزر .. ودخلت فى الغيوم .. واجبرتها على انها توسع فى الحتة اللى دخل فيها الشعاع وتنزاح مسافة حواليه ..

وساعتها شوفت الناس جوة .. وكأنهم عميان واول مرة يشوفوا انوار .. كانوا مذهولين بشكل رهيب ..

والرب كان بيقولى ان الفترة اللى جاية ها يملى افواه أولاده المليانين بحقه .. وها تنطلق منهم كلمات حق من الله مباشرة .. حق مليان بقوة الاعلان .. وها يكسر الظلام بصوته وضجيجه .. وها يجيب الناس للحرية والشفاء ..

وكمان فيه ناس خاضعين مكرسين امناء .. قلة .. ها يكون ليهم اعلان بعلم .. يعنى ممكن يقولوا اسرار لناس فى اعماقهم .. فقط من اجل قيادتهم لله واخراجهم من السجن .. وليس لتسكين الناس او اعرفلى لو سمحت ربنا عايز ايه فى كذا او كذا ..

وهنا اتقفلت الرؤية قدام عيون روحى .. صوت الرب ارعد .. صوته قوى يهدم ابليس ويصنع عجائب .. صوته فى أفواهنا اعلان للخلاص ..

ولإلهنا كل المجد .. 🔥🔥

Oct 21, 2019 1:22:50pm