لا توجد ذات في السماء - رؤيا روحية ..

 

النهاردة الرب فكرنى برؤية بقالى كتير بأجل انى اكتبها لانى بخاف منها .. بقالى تقريبا حوالى شهر مش قادر اكتبها ..

شوفت مشهد من السما .. شوفت جمهور كبير من الناس متجمعين فى شكل نصف دايرة حول عرش ممتلىء بالنور والنار .. منظره مهيب وممتع .. تنظر إليه فتمتلىء بالشفاء والفرح والحق والراحة والحب .. ملايين المشاعر فى لحظة واحدة ..

شوفت الناس دول كلهم .. خامتهم من نور وملامحهم واضحة جدا .. لكن اللى لفت نظرى انهم كانوا شفافين تماما .. يعنى تبص لواحد تشوف كل اللى وراه من الناس الباقيين .. لغاية ما عيونك تجيب اخر المشهد اللى هو اصلا مش ها يخلص ..

بسأل الرب بقوله ازاى يارب الناس دول شفافين كدة .. ؟؟🤔🤔

الرب رد على .. رد مرعب بالنسبة لي .. قالى " لانهم مش مليانيين بذاتهم .. السماء يا محب ما فيهاش ذات تماما .. الكل فيها بلا ذات .. ومن يمجد ذاته لن يدخلها .. لن يقف امامى فى السماء الى الابد .. " 🤔🤔

ملحوظة الذات كلمة بتقدم معنى مختلف عن " النفس " .. لان كل واحد ها يبقى عارف هويته يعنى مدرك نفسه كويس وهوية اللى حواليه حتى لو ما شافهومش قبل كدة ..

وسمعت صوت فى روحى .. " انا قد اخليت نفسى من المجد ومن اجلهم قدست انا ذاتى "

ساعتها فهمت ليه ابليس وملائكته لم يكن متاح لهم ان يتواجدوا فى السماء ..

المحزن انى شوفت فى روحى مئات الخدام والناس اللى ماسكين المناصب الدينية المختلفة من اصغرها لأكبرها .. كتير جدا منهم ما كانوش واقفين امام الرب فى السماء .. 😢😢

ومئات الاشخاص اللى صنعوا عجائب بإسم المسيح واخرجوا شياطين وشفوا مرضى .. لكنهم لم يتواجدوا فى السماء .. 😢😢

لانهم ببساطة عبدوا ذاتهم كما ابليس .. لم يعبدوا الرب .. فكان إلههم ذاتهم وليس الرب .. تماما كما ابليس .. فكان نصيبهم خارج محضر الله .. فى الجحيم الممتد الى ابد الابدين .. 😢😢

وهنا اتقفلت الرؤية قدام عيون روحى .. ومن وقتها وانا مش ناسى المشهد ولا الكلمات دى .. ومليان رهبة وخوف ..

يارب ساعدنى لكى لا تقوى ذاتى على .. احفظ قلبى كاملا امامك .. لكى لا اصير عبدا لذاتى .. لكى يكون لى الحق فى معاينة انوار مجدك .. 🔥🔥

Oct 24, 2019 11:57:05pm