ابليس ينسج شباكه ببطء ..

 

من امبارح وانا كل كام ساعة ألاقى فكرة سلبية او فيها خوف او يأس او احباط .. ظهرت فى اعماقى .. ومن امبارح وانا مستغرب ومشغول بالموضوع ده ..

وعمال اسأل نفسى هو فيه ايه ؟؟ وكل شوية ألاقى فكرة جديدة .. تبان واقعية فعلا وبتنتمى لحياتى .. لدرجة انى كنت بسمع خدمات او اصلى وارجع تانى ألاقى نفس المشاعر والافكار دى واقفة تانى مستنيانى !!

النهاردة الصبح .. قومت وانا مضغوط جدا جدا وحاسس انى مجهد تماما .. و مش قادر انى افتح كلمة الله وتخرج على حياتى انوارها المهولة الممتعة ..

لغاية ما قولت .. لأ بقى .. كدة الموضوع زاد عن حده .. وقعدت اصلى واسمع للرب اللى بيتكلم فى روحى ..

ما سمعتش صوت واضح المرة دى .. لكنى حسيت بنسيمه اللى معودنى عليه .. هدوء رهيب وتحس انك برة الزمن والظروف والحسابات .. واتنفست وحاسيت براحة .. لانى لاقيت نفسى بعرف السبب مباشرة ..

شوفت فى روحى شبكة كبيرة شبه الشباك اللى بتبقى فى الميناء واللى بيستخدموها فى الحدود المائية .. حبالها قوية جدا .. ومحاوطانى تماما .. وانا محبوس جواها وما كونتش مميزها .. وصليت وانتهرت الفخ ده بإسم يسوع .. والشبكة اتقطعت .. وساعتها حاسيت فجأة ان السماء نورت من جديد ..

مرات ابليس بيحاوط الناس بفخ وهما مش واخدين بالهم ..

فخ بيبنيه حواليهم بهدوء تام وبدون اى ازعاج لأى حد .. افكار بهدوء تعيش وتستقر فى اعماقهم .. ومشاعر وذكريات ومواقف سلبية تيجى بتراكم وبالتدريج او يطلع جزء منها قديم لم يتم شفاءه .. وينسجهم على بعض زى العنكبوت .. لغاية ما تلاقى نفسك فجأة .. وبلا سبب بتسقط وكأنك بتختنق ..

واحيانا الشباك دى مش بتكون بس نفسية دى ممكن تكون نفسية وجسدية واجتماعية ووظيفية ..

ومش بس بتكون لهدف احباطك .. لأ دى ممكن تتدفع ناس لعادات نجسة او اباحيات او شذوذ او انتحار او تدمير لعلاقات سليمة او انفصال او ترك وظائف او نجاحات بلا سبب ..

الحلول المتاحة هى اللجوء الى الله .. والتمييز الروحى ..

ولو مش متاحة .. ألجأ بسرعة لجسد الرب .. مجموعة روحية سليمة تساعدك او لشخص روحى ناضج .. وطبعا ده الى جانب الصلاة والصوم وطلب وجه الرب ..

اختم كلامى بكلمة الله ..

المزامير ١٢٤ : ٧
انْفَلَتَتْ أَنْفُسُنَا مِثْلَ الْعُصْفُورِ مِنْ فَخِّ الصَّيَّادِينَ. الْفَخُّ انْكَسَرَ، وَنَحْنُ انْفَلَتْنَا.

المزامير ١٤١ : ٩
احْفَظْنِي مِنَ الْفَخِّ الَّذِي قَدْ نَصَبُوهُ لِي، وَمِنْ أَشْرَاكِ فَاعِلِي الإِثْمِ.

الامثال ١ : ١٧
لأَنَّهُ بَاطِلاً تُنْصَبُ الشَّبَكَةُ فِي عَيْنَيْ كُلِّ ذِي جَنَاحٍ.

شكرا يارب لان هذه الكلمات تتم فى حياتنا وننفلت وتبطل امامنا شباك العدو فى اسم يسوع 🙏🔥