لا تكن مثل ابليس الذي لم يثبت في الحق ..

 الصبح وانا قاعد افكر فى طبيعة ابليس .. الكائن المؤذى ده ..

الرب قادنى للاية دى ..

ابليس لم يثبت فى الحق .. والسبب لان الحق ليس فيه .. يعنى لانه فضل ان الحق ما يكونش فيه .. لانه شاف ان مصلحته وذاته ومجده .. مش ها يتحققوا غير لو الحق كان برة كيانه ..

لان لو الحق جواه .. ما كانش الكذب عاش فيه ونجح يمتلكه ..

ولو كان الحق جواه .. كان لازم ها يعترف ان الله خالقه وسيد وإله ..

لكنه لم يحتفظ بالحق فيه .. لذلك لم يثبت فى ارض الحق .. نزل من الحضور الالهى .. نزل الى الاسفل .. ولم يعد فى العلاء عندما كان يعاين انوار ومجد الساكن فى العلى الجالس فى وقائد نارية ..

المسيح بيقول لليهود اللى رفضوه ان ابوهم مش الله .. ابوهم ابليس لانهم بيتمموا كل شهوة ابوهم .. ابناء مطيعين لأب شرير .. 

 

النهاردة لازم تقرر مين هو ابوك .. هل انت بتعمل اعمال ابوك وبتتم شهوات ابوك .. من اعمالك ها تعرف ابوك ..

ومن ابوك ها تتولد اعمالك وشهواتك ..

كل من يبحث عن مجد نفسه يبتعد عن الحق .. ولا يثبت فيه بل يثبت فى الكذب .. ويكون كأبيه كإبليس .. وشهوات ابوه سيعمل .. وسيقتل لان ابو قتال .. وييمتلىء بالظلم والظلام لان الحق ليس فيه ..

خلى بالك ابليس بيجتهد انه يسلبك الحق .. يقولك انزل غير جو مش مهم تقعد تقرا كلمة الله .. مش مهم تقرب من الله دلوقتى .. حقق اهدافك وتوب بعدين .. الله اصلا سيد قاسى .. يفصلك عن الكنيسة .. يقولك دى موضة قديمة .. دى ناس رجعية .. ركز فى مستقبلك فقط ..

ابليس كلامه مش بيخلص .. لانه كذاب والاكاذيب نهر مش بيخلص .. كلام الظلمة كتير ..

إلتصق بالرب .. اطلب الحق .. والرب ها يحررك من قيود ابليس .. تعرفون الحق والحق يحرركم ..

والفاهمون يضيئون .. تمام كأبيهم ابو الانوار .. ولإلهنا كل المجد الى ابد الابدين ..

Sep 07, 2019 4:06:25pm