مسئولية الكنيسة في اطلاق الاعلان الالهي - رؤيا روحية ..

 من فترة كنت بصلى .. وشوفت رؤية وكتبتها .. بس فكرتنى بيها حتة كنت بسمعها من شوية فى كتاب ل ديريك برنس .. الحرب في السماويات ..

شوفت ان فى ناس متواجدين فى معبد وثنى غريب على اعمدته تنانين .. ولابسين لبس يشبه الصينيين فى معابدهم القديمة ..

وقاعدين فى ثبات تام وكأنهم بيتأملوا او بيستقبلوا اعلان معين من الظلمة ..

وكانوا متناغمين تماما وكأنهم بيتمتموا بنفس الكلمات ..

وفجأة لاقيتهم بيصفقوا صقفة كوية جدا .. ومع الصقفة دى .. شوفت قوة هائلة زى الموجات طالعة من صقفتهم .. بدأت تخرج من المعبد الغريب ده .. ورياح وغيوم بتغطى السماء فوقهم ..

وبدأت الموجة الخارجة من صقفتهم تتحرك ومعاها الرياح والغيوم وبدأت تشيل كل بيوت قدامها وكل حياة تدمرها ..

والناحية الثانية شوفت مؤمنين قاعدين مجموعة راكعين على الارض بيصلوا وبيهتفوا وبيعلنوا اعلانات السماء .. وفجأة لاقتهم صفقوا .. وخرجت موجة رهيبة القوة من صقفهم وهتافهم ..

وخرجت مندفعة كأنها اعصار .. لغاية ما صدمت موجة الناس اللى فى المعبد ووقفتها عند حدها .. والموت توقف والدمار توقف ..

اللى فكرنى بالكلام ده .. ان ديريك كان بيقول ان الحرب فى السما قائمة على قوة الاعلان الالهى والعبادة والتسبيحات الحقيقية ..

وان ابليس عارف قوة الاعلان علشان كدة هو كمان بيبعت اعلانات لأبناء الظلمة وللسحرة والمشعوذين وصانعين الظلمة المهرة .. علشان يكون اعلان فى السماويات يعطل بيه امتداد ملكوت الله وخلاص البشرية ..

وقال ان الكنيسة لازم تبدأ تفعل .. قوة الاعلان الالهى سواء فى كلمة الله او بما يعطيه الروح القدس للكنيسة .. ولازم تمتلىء بالاعلان وتطلقه بقوة .. لان ده سلاح هام جدا فى الازمنة الاخيرة والصعبة اللى بيمر بيها العالم ..

الملخص اللى جوايا .. الحرب فى السما .. لازم تكون ناتجة عن علاقة حقيقية من الكنيسة مع الله .. ولازم يكون فيه تواجد للكنيسة فى السماويات بإعلان وتسبيح وعبادة واطلاق سلطان .. من اجل قمع ابليس وجنوده واطلاق يد الله ..

وغير كدة تبقى الكنيسة مش كنيسة .. تبقى شكل كنيسة وبس .. او تبقى كنيسة لم تنضج فى انفتاحها على ملكوت الله ..

والفاهمون يضيئون .. 

Sep 25, 2019 11:15:53pm