رسالة حزقيا الملك في وقت المِحنة ..

 بقالى كام يوم مشغول برسالة حزقيا الملك اللى بعتها مع مرسلين منه ل اشعياء النبى ..

وعمال اسأل نفسى .. لو انا كنت ملك والمدينة متحاصرة ومئات الالاف من الجنود برة .. وتعييرات رهيبة بتترمى على الشعب .. والوقت ضيق خالص .. ولازم تبعت تطلب نجدة من نبى الرب ..

ها تقول ايه .. اكيد ها تحكى عن بشاعة الموقف وعدد الالات والامكانيات اللى عند العدو او تاريخه الحربى او التلفيات اللى فى الاسوار والابواب او الجوع ونقص المخزون ..

لكنه اذهلنى لانه بعت وقال الجملتين دول بس .. !!

اشعياء ٣٧ ..

٣ فَقَالُوا لَهُ: «هَكَذَا يَقُولُ حَزَقِيَّا: هَذَا ٱلْيَوْمُ يَوْمُ شِدَّةٍ وَتَأْدِيبٍ وَإِهَانَةٍ، لِأَنَّ ٱلْأَجِنَّةَ دَنَتْ إِلَى ٱلْمَوْلِدِ وَلَا قُوَّةَ عَلَى ٱلْوِلَادَةِ.

4 لَعَلَّ ٱلرَّبَّ إِلَهَكَ يَسْمَعُ كَلَامَ رَبْشَاقَى ٱلَّذِي أَرْسَلَهُ مَلِكُ أَشُّورَ سَيِّدُهُ لِيُعَيِّرَ ٱلْإِلَهَ ٱلْحَيَّ، فَيُوَبِّخَ عَلَى ٱلْكَلَامِ ٱلَّذِي سَمِعَهُ ٱلرَّبُّ إِلَهُكَ. فَٱرْفَعْ صَلَاةً لِأَجْلِ ٱلْبَقِيَّةِ ٱلْمَوْجُودَةِ».

حزقيا بيقول كدة ل أشعياء .. بيقوله اعرض حالتنا كلنا قدام الرب ..

الرب هو اللى خلقنا وهو عارف كل حاجة .. احنا فى وضع صعب جدا لدرجة اننا قربنا نموت احنا واجيالنا الجديدة ..

لا توجد قوة بداخلنا تجعلنا ننجح فى انهاء الحرب والحصول على فرح وخلاص ..

واحنا معترفين بأخطائنا ومدركين اننا نستحق التأديب الموجع ده ..

الشعوب اللى حوالينا ها يعتبرونا اننا فى اهانة .. وكأن إلهنا مش موجود او ضعيف زى الالهة اللى شعوبها انتهت قدام الجيوش دى ..

روح قول للرب .. ما عندناش كلام نقوله .. لاننا بنموت ونسلنا بيموت .. لا توجد قوة على الولادة .. !!

الكلام وانا بصلى بيه .. حاسه حروف من نار .. مشاعر حقيقية بإدراك روحى .. فى جملتين بالظبط ..

ايوة يارب ده وضعى فى ظروف كتير .. لا توجد قوة على الولادة .. لا توجد قوة على ايجاد خلاص او صنع فرح جديد ..

لكن هلليلويا .. الرب عطى اشعياء قبل ختام السفر نص قوى جدا وكأنه بيرد على كل تساؤلاتنا ..

اشعياء ٦٦ ..

"٧قَبْلَ أَنْ يَأْخُذَهَا الطَّلْقُ وَلَدَتْ. قَبْلَ أَنْ يَأْتِيَ عَلَيْهَا الْمَخَاضُ وَلَدَتْ ذَكَرًا. ٨مَنْ سَمِعَ مِثْلَ هذَا؟ مَنْ رَأَى مِثْلَ هذِهِ؟ هَلْ تَمْخَضُ بِلاَدٌ فِي يَوْمٍ وَاحِدٍ، أَوْ تُولَدُ أُمَّةٌ دَفْعَةً وَاحِدَةً؟ فَقَدْ مَخَضَتْ صِهْيَوْنُ، بَلْ وَلَدَتْ بَنِيهَا! ٩هَلْ أَنَا أُمْخِضُ وَلاَ أُوَلِّدُ، يَقُولُ الرَّبُّ، أَوْ أَنَا الْمُوَلِّدُ هَلْ أُغْلِقُ الرَّحِمَ، قَالَ إِلهُكِ؟ ١٠افْرَحُوا مَعَ أُورُشَلِيمَ وَابْتَهِجُوا مَعَهَا، يَا جَمِيعَ مُحِبِّيهَا. اِفْرَحُوا مَعَهَا فَرَحًا، يَا جَمِيعَ النَّائِحِينَ عَلَيْهَا "