ارواح الكذب تسكن فم الكثيرين واعماقهم - رؤيا روحية ..

 من شوية كنت بصلى .. وشوفت ناس كتيرة واقفين قدام ستار بيصلوا ..

ميزت فى روحى انها مكان عبادة يشبه الهيكل والحجاب اللى قدام الهيكل ..

وعلى فكرة شكل الهيكل لم يظهر فى الرؤية ولا ظهر اى رمز يحدد طائفة معينة .. وانا مش الشخص اللى متعصب وبيكون فكرة على هواه او بيخبط فى عقائد او طوايف تانية .. لا خالص .. والرب طلعنى من سلطان التعصب من سنين كتير ..

المهم الناس دول كانوا واقفين يصرخوا ويعبدوا من بعيد كأنهم مليانين حرارة .. كأنهم فى ثورة او مسيرة وبيهتفوا .. الحقيقة هما كانوا فاكرين انهم بيعملوا كدة لله ..

لكن اثناء ما بيهتفوا .. لاقيت ألسنتهم بدأت يتغير شكلها وبدأت تشبه الثعابين السامة بدأت تطلع من فمهم بهدوء وتعمل فحيح صوت ثعابين مزعج ..

الغريب ان لا الناس اللى بيهتفوا فى المقدمة كانوا مميزين كدة .. ولا الناس الوافدين الجدد اللى بيجروا على الزحمة واللمة اللى باين من برة انها للرب ..

ببص عليهم من بعيد .. لاقيت المشهد بيتغير قدام عيونى .. الحجاب او الستارة .. ضاعت رسوماتها الجميلة وألوانها اختفت .. وبدأت تدخل على اللون الاسود ..

وفجأة الرب خلانى اشوف اللى ورا الستار من فوق .. اللى المفروض مكان اقدس مقفول عن عيونهم ..

وهنا كانت المصيبة ... شوفت عرش كبير اسود وعملاق جدا .. والجالس عليه .. وحش واضح المعالم يشبه الانسان فى اديه ورجليه .. لكن ذيله ثعبان كبير جدا .. وراسه تشبه تنين وتمساح .. وصوت الثعبان واضح جدا منه وصوت ذيله وحركته مزعجة جدا .. !!

اتفزعت فى روحى .. وقلت يارب طيب الناس دول مش مميزين خالص .. دول قادة لناس وراهم .. طيب ذنب اللى وراهم ايه ؟؟

لاقيت الرب بيرد على .. رد قاطع .. " هما اختاروا كدة .. هما مش بيدوروا على .. خرافى تسمع صوتى .. وانا اعرفها .. وهى تتبعنى .. "

وهنا اتقفلت الرؤية قدام عيون روحى .. ارواح الكذب تسكن فم الكثيرين واعماقهم .. وهى تخدعهم وتخدع بهم .. ولن يدركوها لان صوت المسيح ليس فى اذانهم .. وقلوبهم قد ابتعدت ..

والفاهمون يضيئون .. لان السماء تفحص .. ولن يعبرها الا من يقوده الابن .. امين ..