معرفة ومياه العالم مهلكة - رؤيا روحية ..

 من فترة كنت بصلى .. وبطلب من الرب حماية من المعرفة اللى ممكن تهلك للابد وتضيع على الانسان نوال الحياة الابدية ..

وانا بصلى .. شوفت ناس كتير واقفين تحت جبل او مرتفع يشبه الشلال .. والمياه متدفقة من عليه بقوة واندفاع ..

ميزت فى روحى بوضوح انها مياه العالم ..

الغريب ان الناس اللى كانوا تحت الشلال ده بيشربوا من المياه بتاعته .. كانت اجسامهم نحيلة جدا جدا .. ولبسهم متقطع .. وملامحهم تشبه الموتى .. جلدهم متقرح ومتلوث .. واجسامهم مسودة وشاحبة ..

الغريب انهم كانوا عمالين يشربوا من المياه بشراهة لا نهاية لها .. كأنهم مش بيرتوا ابدا ..

العجيب انهم كانوا بيستحموا بالمياه دى وبيلعبوا وبيضحكوا .. وهما مش مدركين ان منظرهم كدة .. موتى ..

ببص على المياه .. شوفت فيها كائنات صغيرة .. الناس اللى تحت مش شايفينها ..

الرب ورانى فى روحى شكل الكائنات دى عن قرب .. كائنات شاحبة تشبه الظل .. كائنات مميتة فعلا وطبيعتها مظلمة جدا ..

وكانت الكائنات دى .. بتدخل جوة اجسام الناس وبتخليهم يتصابوا بهذلان اكتر .. ويشربوا اكتر علشان يفوقوا مؤقتا ..

واتقفلت الرؤية قدام عيون روحى ..

افتكرت وصف الكتاب .. عن الناس اللى فى العالم .. يشربون الاثم كالماء .. !!

كل معرفة بعيد عن الرب بتدخل لأعماق الناس بتملاهم بموت وهلاك .. وارواح مدمرة بتدخل عالمهم وبتهلكهم ..

يارب قدانا لمعرفتك الى من نذهب كلام الحياة الابدية هو عندك .. اجعلنا نمتلىء بمعرفتك كما تملىء المياه البحر .. اجعلنا نؤمن بيك وننفتح عليك لان من امن بيك تجرى من بطنه انهار ماء حى ..