لا تتنازل عن الوقوف قدام الرب - رؤيا روحية ..

 امبارح كنت بصلى ..

وشوفت شخص جاثى على ركبتيه بيصلى .. لكنه كان متألم جدا ..

شوفته من ظهره مشدود بسلسلة عملاقة متثبتة فى ظهره .. ببص لاقيت اخر طرف السلسلة دى .. ممسوك بإيد كائن شيطانى .. واقف محتجب فى الظلام ..

فهمت من المشهد .. ان الشخص ده بيعانى وطالب الرب لكنه مجهد تماما لدرجة انه مش عارف يعمل حاجة ولا عارف ايه سبب الاجهاد الدائم ده ..

السبب كان ثقل السلسلة دى .. والكائن اللى بيشدها فى الظلام ..

المهم فضل الشخص ده بيصلى لدرجة انى حسيته بيفقد كل قوته وبينهار .. لكنه متعلق بالرب ..

وفى اللحظة دى .. شوفت الرب فى شكل شخص مضييء لابس ملابس ناصعة .. بياضها من عالم تانى فعلا ...

وجيه ووقف فى النص بين الكائن الشيطانى والشخص اللى بيصلى .. وعطى ظهره للرجل وبص ناحية الظلام ..

ومسك السلسلة العملاقة .. وشدها بقوة رهيبة لدرجة انه اخرج الكائن الشيطانى من ظلامه ووقفه قدامه ..الكائن ده كان فعلا قوى جدا عضلاته وحركته على الارض وملامحه .. فعلا محارب قوى ..

لكنه فعلا كان مرعوب من نور الرب وبيغطى وجهه وبيبص فى الارض كأنه متألم من النور اللى خارج من الرب ..

والرب اخد السلسة من ايده بكل سهولة .. ومسكه وحدفه للظلام .. كأنه جسم خفيف جدا .. !!

واتجه للرجل المطروح على الارض فى اعياء .. واتملى المشهد بضوء لا ترى منه اى شىء اخر ..

واتقفلت الرؤية قدام عيون روحى ..

الاصرار على الوقوف قدام الرب .. هو اكبر اسلحتنا .. لان الرب لما بيتواجد فى المشهد بينتهى سلطان الظلام في لحظة ..

ابليس بيجتهد انه يشدنا للظلام .. لكى لا نطلب ابو الانوار .. ونهلك فى الموت حيث الظلال ..