اختبار جميل..

 اختبار جميل .. 

من فترة كان فى شخص غالى عندى .. كان داخل عمليات .. وكانت نفسيته منهارة وموجوع جدا وخايف من احداث كتيرة .. 

حد اتواصل معايا قبل العملية بيوم .. وقالى ارتبلك وتصلى معاه فى الموبيل .. وكلمنى عن وضعه الصعب نفسيا .. 

قولت ماشى نعمل كدة ليه لأ .. 

انا دايما عندى ايمان ان الرب قادر انه يتدخل في اى وقت .. 

كلمته بالليل وكانوا مبلغينه ومرحب بكدة .. 

هو بيحب الصلاة .. لكن عمره ما صلى مع حد فى موبيل .. بيحضر اجتماعات بس .. 

بدأت اشاركه بالحق اللى جوايا .. واشاركه بإيمانى فى شكل وقت الصلاة ده .. وهو صدق معايا فى الحق وامن فى اللى انا كنت مصدق بيه عن الوقت ده .. 

بدأنا الوقت .. وبدأت اشعر بشعور كنت بحسه فى الاجتماعات .. لكنى ميزته فى المكالمة .. الاجواء بدأت تمتلىء بحرارة روحية .. 

وعرفت ساعتها ان الروح القدس يملىء اجواء التواصل ده .. بدأنا نصلى بحق واعلان للحق .. 

وبعدها قولتله .. الرب ها يديك تتملى ضحك .. 

فى اوقات وانت فى الروح وجوة حرارة روح الرب .. بتبقى مميز ان اللى بتقوله منه وبيحصل .. 

بدأ فعلا يضحك ويغمره فرح وراحة وسلام .. 

وقولتله انت كمان ها تكون بتتكلم بالالسنة .. هو من الاول قبل الاحداث دى من فترة كان بيتكلم بالالسنة .. لكنه من وقت الالم ده وهو مش بيتكلم ..  قولت له ها تتكلم بألسنة وصوتها ها يبقى قوى .. والرب ها يديك كلمات مختلفة كمان .. وفعلا ده حصل .. 

وراح عمليته تانى يوم وهو كله مليان فرح رغم انه ممكن يكون بيخاف من شكة دبوس .. 

بشارك بالقصة دى .. لسببين .. الاول دور الشخص اللى اصر انه يرتب معايا اننا نصلى مع اللى داخل العملية .. ده دور رهيب وحاسم فى القصة .. ده اللى بسميه دايما خدمة حاملى المفلوج .. يعنى تجيب حد مش قادر .. للرب .. وهناك ينال الشفاء .. 

السبب الثانى .. ان الرب ما عندهوش مستحيل .. ويعرف يعمل اى حاجة فى اى وقت .. فصدق انه يعرف يعمل اللى انت مش ها تعرف تعمله .. فقط روح بإيمان .. وقوله اعمل يارب اللى انت عايزه لانى مش ها عرف انا .. 

والرب ها يتمجد لانه إله عظيم وصانع عجائب .. امين ..