السحر .. وقوة التوبة ..

 

بخصوص السحر ..

بينجح ابليس انه يقنع الناس ان السحر قوة خاصة مهدفة عليهم و انهم مش ها ينفع بسهولة يخرجوا من تحت التدمير ده ..

وناس تانيين بينجح ابليس انه يخليهم مربوطين بفكرة ان كل تعطيل بيحصل لهم لابد وراه سحر مدمر ..

و ان لازم حد معين هو اللي يكسر السحر ده ..

و ده فعلا بيبقى حقيقي أحياناً لو الرب منح لشخص شرف انه يدخل معاك الحرب دي ويصلي ويطلب نصرة المسيح ..

لكن اللي مش صح ومش حقيقي .. انك تفترض انك غرقت لو ما فيش حد يساعدك .. وتفترض ان قصتك اتحسمت في دمار لان في سحر ..

اسف .. لحد هنا ووقف .. !!

السحر نوع من انواع كتير للنشاط الشيطاني .. وهو مش نهاية قصتك .. وبيتلف بسهولة جداً زي باقي نشاطات ابليس بمجرد ما الشخص يطلب خلاص المسيح ويعيش متلصق بكلمة الرب بأمانة وخضوع ..

بمجرد ما بتعيش وتنتمي لملكوت الرب .. بتدرك ان ابليس صغير ومعظم اسلحته قديمة اوي ومتهالكة قدام قوة الرب في ملكوته ..

فبرجاء .. قبل ما تدور على حد يكسر السحر .. روح توب فعلا من قلبك امام الرب واطلب الخلاص اللي لك في المسيح .. وعيش بأمانة وخضوع للرب ..

لان قوة الرب إذا دخلت حياتك فعلا .. السحر هو اللي ها يهرب من حياتك ويتصاب بالفشل وقضاء الرب ها يدركه بدينونة للابد ..

قوة الرب تقدر تعيق نشاط الشرير .. و تجهز اشخاص للمعونة و التحرير .. 

اقضي وقت مع كلمة الرب  .. اخضع لها و توب .. احضر وسط مؤمنين امناء ممسوحين بالروح القدس .. و سترى بدأ نهاية قيود الشرير و تلفها .. 

امين امين امين 🙏