التحنيط طب ام سحر .. ؟

 

 التحنيط طب ام سحر .. ؟؟ 🤔

اكيد فخور بمصر جدا ودايما .. لكن هذا لا يعنى انى اعتبر التحنيط علم طبى مطلق .. !!

لا خالص .. اعتذارى للقامة اللى كتب انه علم طبى ..

المصريين القدماء مش اى طبيب عندهم كان بيحنط حد .. !! 👉👉

- التحنيط كان من اختصاص رتب معينة سواء من كهنة او اطباء قصر الملك ..

- التحنيط علم .. اه علم لانه له مبادىء منظمة وطرق بيتوارثها فئة من الناس .. لكن برضه التنجيم علم .. وده مش معناه انها علوم كلها طبية او فزيائية او رياضية فقط .. وهدف اى علم بيبقى ضرورة علشان تحكم حكم سليم عليه ..

فهدف التحنيط حفظ جثث الملوك للاجتياز الى البعث والخلود فى منطقة تحكمها آلهة غريبة تماما عن الرب الاله كما اعتقد الفراعنة .. !! زى ما هدف التنجيم الاتيان بمعرفة غريبة عن معرفة الرب الاله .. وده لا يجعلهم محض موافقة ابدا مع منهج الكتب المقدس .. ابراهيم جد يعقوب ابو يوسف .. كان رجل خليل الله وعارف القواعد كويس .. ورغم تمسكه بسارة .. لكنه طلب دفنها وقال ابعدوا عنى ميتى .. يعنى لازم يكون فيه فاصل بين حالة الموتى والاحياء .. ويمكن شريعة الرب لموسى اظهرت ده بوضوح بعد يوسف بكتير .. !!

- برضه التحنيط كان درجات .. ففى تحنيط لفئات حكومية موظفين دولة او اغنياء .. وده غير تحنيط الملوك .. !!

تحنيط الملوك كان فيه جمل وتلاوات وصلوات من كهنة الالهة .. ومنها من كتاب الموتى .. ودى كتب اكيد استخدمت فى السحر او فى استدعاء قوى .. لحماية ارواح الملوك .. كما كانوا يظنوا .. !!

- تحنيط يعقوب كان بمثابة حفظ مؤقت .. وفى بعض الاصول بيستخدموا جملة ان يوسف استدعى من لهم المعرفة او التخصص .. المعروفين بالاطباء .. وده مش معناه ان التحنيط علم طبى فقط .. !!

المواد اللى وضعت على يعقوب لا يمكن ان تكون كمواد الملوك .. لان الفراعنة كانوا متعصبين اوى فى الاتجاه ده .. ولذلك اكيد ما تمش ابدا تلاوة طقوس عليه لحماية كالملوك .. !!

- كمان يوسف لم يقبل ان يكون ابوه محنطا ولذلك طلب معالجة للجسد ليصبح غير متعفن لحين دفنه .. وكلم المقربين من فرعون .. ليدفن جسد ابوه فى ارض كنعان وليس حتى دفن فى ارض مصر .. !! ولذلك هو ما قبلش طقوس التحنيط الخاصة بكهنة آلهة مصر .. لانه كان واعى اوى وامين .. !!

- طيب لما قارب يوسف على الموت هل وافق على التحنيط لجسده ؟ الاجابة لا .. لان قال لإخوته .. مهما اطالتم فى مصر .. خدوا عظامى .. وليس جسدى المحنط .. !! وادفنوها معاكم فى ارض كنعان ما تسيبوهاش فى مصر .. ورغم ان جسده حنطه المصريين لانه كان له مركز فى الدولة ..الا ان ده برضه مختلف عن تحنيط الملوك .. وهو كان رافضه ..!!

تعليقى الاجمالى .. 👉👉

اولا : بنفخر بمصر دايما .. افضل بلاد الدنيا ارض باركها الرب .. لكن ده لا يسمح لنا ان نطوع مبادىء الكتاب المقدس او قصصه حتى لو كان الهدف تكريم حضارتنا السابقة ..

ثانيا : الفيس مجال ضخم للنشر .. لكن يؤسفنى انه بقى مجال للتراشق .. وكله بيدخل يجرح اى حد بيناقش اى فكرة غريبة عنه .. وده غير صحى خالص وبيعكس تشوه جوة الناس حتى لو قادة او لهم باع او علم .. ودى حاجة تحتاج ان نصلى علشانها ونواجهها جوانا اولا .. لاننا لابد وما فيش اختيار تانى .. ان نكون صورة المسيح للعالم ..

ثالثا : ها يكتر تعليم غريب فى اخر الايام .. وممكن من ناس موثوق فيهم جدا ..!! تضلون اذ لا تعرفون الكتب ولا قوة الله .. افحصوا الكل بدقة .. وتسرى هذه القاعدة حتى على اى كلام انا نفسى بقوله .. وشكرا ..