لا يوجد مجد الا مع الرب - رؤيا روحية ..

 من شوية شوفت مشهد غريب من الجحيم ..

شوفت ناس حققوا على الارض انتصارات او انجازات كان العالم بيفخر بيها ..

البعض كان محقق انتصارات عسكرية ومعاه نياشين كتير اوى ..

وناس تانيين كانوا خدام وقادة دينيين وكان حواليهم مئات الملايين من الناس اللى بتصقف لهم وبتهتف بإسمهم وبترمى تحت رجليهم حاجات غالية كتير ..

وناس تانيين مشاهير فى عالم البشر .. معاهم مراكز عالية جدا وامكانيات مهولة وجمهور كبير بيحبهم ..

شوفتهم كلهم فى الجحيم ..

العجيب انى شوفت حاجة رهيبة .. ان كل ما الناس دول بيجيلهم لحظة ويفتكروا حاجات مفرحة لهم فى ذكريات مجدهم الارضى ..

بلاقى فجأة كائن شيطانى شعر بيهم فى نفس اللحظة وراح بغضب يهينهم ويملاهم من جديد بالعار والخزى ..

وانا بشوف المشهد ده .. خرجت بإنطباعات رهيبة .. 🤔🤔

اولا .. ما فيش فخر الا بالرب .. وأى حاجة تانية مش ها ينفع تسبب لا فخر ولا فرح بدون التواجد فى محضر الله ..

ثانيا .. الجحيم بيئة الخزى والعار والظلام .. ولا يمكن هناك لأى كائن ان يحصل على فخر حتى من امجاده الشخصية .. هناك كل مجد من الارض يفنى ويتدنس ويضمحل ..

ثالثا .. كائنات الظلام .. متشوهة تماما .. لدرجة ان اى لحظة لمجد اى حد .. هما بيفنوها فى لحظتها .. لانهم مليانين حقد رهيب انهار من الحقد ..

المجد وحده فى صاحب المجد ... والنور فقط فى محضر ابو الانوار ..

والفاهمون يضيئون .. وطوبى لمن يحسب الكل نفاية .. امين ..