اختبار لمجد الرب .. و لتعليمنا .. 🙇🏻♂️
عايز اشارككم بإختبار لمجد الرب .. اترددت اكتبه .. علشان ما نتعطلش بمجد من الناس .. 👉👉 بس هو فعلا اختبار بيعلم حاجات كتيرة .. من فترة اتصلت بى اخت .. وطلبت منى انى اشاركها فى زيارة لحد مريض .. سألتها .. هل هو حد بيتردد على اجتماعتنا .. لان الوقت ضيق خالص ومش مستحمل .. القريبين منى يعرفوا كدة كويس .. ردت على .. رد فرق معايا اوى .. قالتلى لأ هو مش بيتردد على الاجتماعات لكنه نفس فى محنة شديدة جدا ومحتاج للرب .. وما ينفعش نسيبه لوحده .. نفسيته متدمرة والاطباء احبطوه وهو حاسس ان بينه وبين الموت خطوات .. تعالى الرب يتمجد هناك .. كلماتها صعقتنى فى روحى .. وقولت لنفسى ماذا لو وقفت قدام الرب .. وقالى انا ما قولتلكش تخدم بس اللى تعرفهم .. !! قولتلها تمام .. ورتبنا وقت نروح فيه .. وانا معرفش تقريبا اى حاجة عنه .. لا مشكلته واصلة لإيه ولا خلفيت الدينية ولا اى حاجة خالص .. معرفش غير الاخت اللى واخدانى .. !! المهم .. اليوم ده .. حصلت كمية مشاكل مهولة فى كذا اتجاه .. والجو قلب شتاء شديد وبرد .. لدرجة انى بكلم الاخت قبل الميعاد بساعة .. لانى كنت برة .. وتوقعت تقولى لأ ها نلغى .. لاقيتها بتقولى لازم نروح .. صليت جوايا .. يارب انت اللى مصمم مش هى .. وانا عارف انك حاضر فينا .. وها نروح حتى لو متكسرين .. لانك تقيمنا وتقيمه .. وصلت هناك لاقيت اخ غالى ومحبوب لى .. مستنينا وهو اللى كان بيرتب دخولنا البيت .. لانه يعرف العيلة .. وصمم ما يسيبهومش فى محنتهم .. دخلت البيت .. رائحة الموت .. ( وجوده الروحى فى الاحداث ) .. بدأت اشارك الناس اللى متجمعين بكلام الرب .. وانا مميز ان مافيش ولا كلمة او فكرة انا مجهزها .. قولت كلام كان نفسى اكون مسجله .. لانه كلام بالروح على سلطان المسيح على الموت والظروف وتدخله فى وقت حاسم .. وعلى الانقلاب اللى بيعمله تمسكنا بالرب فى اصعب المواقف .. !! فجأة حسيت ان وشوش الناس بدأت تنور وبدأوا يبتسموا مع ان فعلا ظروفهم ما اتغيرتش .. لكن ده بفعل كلمات الحق اللى ماليها روح الحياة .. غيرت جو بيتهم .. ولازم ها تكون بتغير ظروفهم نفسها لان ده اختبار دائم بختبره مع الله .. المهم بدأت احكى قصة حصلت .. والرب اتمجد فيها .. معجزة شفاء .. وفى اللحظة دى بدأ الشخص المريض .. يبتسم زيادة عن اللزوم وعيونه بدأت تتدمع .. وشاورلى على الاشاعات والتحاليل اللى كانت فى اخر الشقة .. وقالى كل اللى انت قولته ده هو وضعى الحالى .. انا فعلا نفس الشخص ده .. !! انا اترفضت من دكاترة تحاليلى واشعاتى لا تؤدى الا الى الموت .. وبتقرير اطباء كتير .. وبدأ يحكى بشاعة الموقف .. لكنه اعلن ايمانه انه مصدق فى الرب .. اللى بعتنا له .. !! وهنا حسيت انى اتصدمت .. لو كنت رفضت اروح .. يا ترى الرجل ده وضعه ها يبقى ايه ؟؟ المهم بدأنا نصلى علشانه .. روحت لغاية عنده .. والناس شاورولى حط ايدك عليه .. انا بخاف اعمل كدة .. لان معتقدات الناس وطوايفهم بتخليهم احيانا ياخدوا رد فعل سلبى .. بس اتشجعت وقولت لو هو رفض .. ها سحب ايدى بهدوء وها نكمل صلاة .. بس لاقيته خاضع وبدأ يترعش .. انا قولت ممكن يكون بردان او حاجة .. فمطولتش وشيلت ايدى وكملت صلاة من بعيد .. بعد الصلاة قال انا حسيت بكهرباء شديدة فى دماغ ورعشة .. وبيقولى انا مش عارف ده ايه .. ابتسمت وقولتله .. دى قوة الله بتدخل ظروفك .. وممكن تنال معجزة شفاء .. وممكن يدخل الله معاك فى العملية .. مرت الايام .. جيه ميعاد عمليته .. اللى وصلنى انه بيقول ان قبل العملية وهو واخد البينج ( على فكرة العملية خطيرة بأعلى درجة لكن ممنوع اتكلم فى تفاصيل ) لقى فى حد بيخبط على صدره وبيقوله فى ودنه بشكل واضح ما تخافش انا معاك هنا .. !! بيقول ان الاطباء اللى فى العملية نفسها .. بيقولوا ان كان فى حاجة غريبة فى العملية دى .. وان الامور كانت فيها ابسط من اى عملية فاتت .. رغم ان الحالة اعقد من حالات كتيرة اوى هما اشتغلوا فيها .. !! مجدا للرب .. هو حاليا بيتعافى لكن وضع حالته مستقر .. اللى عايز اقوله .. ايمان الاخت اللى صممت تروح للمريض ده .. خدمة الخفاء اللى بذلها الاخ الغالى التانى .. اللى خليت وصولنا سهل للناس .. خدمتين ماحدش شافهم .. ما كانوش بيرنوا على المنبر .. كانوا فى السر مش فى العلن .. ماخدوش مجد من ناس .. لكن السماء فوق بتحكى فى سيرتهم .. كمل ايمانك .. صلواتك واصرارك فى الرب .. ممكن فعلا يقلب حياة ناس .. حتى لو اتحاربت واتعطلت كمل دعوتك فى الرب لانك ها تشوف عجائب والرب ها يشاركك معاه في مجده .. فى النهاية .. صلوا علشاننا .. مش تمجدونا .. 🙏🙏 اطلبوا من رب الحصاد انه يرسل فعلة كثيرون .. لان الحقول قد ابيضت .. 🙏🙏
تعليقات
إرسال تعليق