اارب يقتحم الشرير - رؤيا روحية ..

 من كام يوم كنت بصلي ..

وشوفت رجال شايلين من ٤ جوانب .. عرش سيد قاسي اوي شكله عبارة عن غيوم وظلمة ..

كان معاه سوط ( كرباج ) .. وبيضرب فيهم بشكل مستمر .. علشان يتحركوا بالموكب الخاص بمجده هو ..

كان منظرهم صعب خالص .. لبسهم متقطع من كتر الجروح واجسامهم هزيلة خالص من كتر الالم وعدم الراحة ..

وبعدين شوفت الرب اقتحم المشهد الحزين ده .. وفجأة اختفى السيد القاسي ده ..

توقعت من شكله المخيف ان يكون له حرب مع الرب .. لكن ده ما حصلش .. الرب اقتحم المشهد بنور كأنه رعود وبروق ..

وعرفت في روحي .. يهوه فراصيم .. الرب المقتحم .. الرب جاي يحسم قصص ناس مستعبدة لهذا السيد القاسي .. ومن قوة الحسم ده .. مش ها يلحق لا يحارب الرب ولا يعمل حاجة .. ده ها يهرب وبس ..

وبعد كدة شوفت نفس الناس المجروحين دول .. بيكملوا شايلين عرش الرب .. لكن بدأت قوة الرب تظهر فيهم ..

اجسامهم ازدادت في الطول وبقى عندهم عضلات واضحة في كل اجسامهم .. وجروحهم اختفت تماما .. ووجوههم باقت وجوه محاربين .. وملابسهم باقت ملابس جنود ..

دي بقى الترقيات ..

وعرفت في روحي .. ان السيد بيصنع جنوده .. والظلام بيصنع عبيده ..

والرؤيا حكم وإنصاف لمن عاشوا تحت ضيق واستعباد ونزيف لزمن طويل ..

ولرب الصباؤوت المجد الى ابد الابدين .. امين .. 🙇🏻‍♂️🙇🏻‍♂️🙇🏻‍♂️