صوت العدو و اجناده للسلب .. صوت و كلمة الرب حياة ـ رؤيا روحية

 من شوية كنت قاعد وجوايا بوضوح ان العالم مليان بصوت ابليس وأكاذيبه ..  لدرجة ان الناس ما باقوش عارفين يميزوا ان ده صوت ابليس او ان ده كذبه ..

بقى ده العادى بالنسبة لهم .. وللاسف عمرهم ما ها يعرفوا كدة غير لو فتحوا كلمة الله وبدأوا يسمعوا لصوته وللحق اللى خارج منه ..

وانا بفكر وبقول الناس دول فى مصيبة كبيرة تستمر للابد ..

شوفت غرفة خشب مظلمة رطبة .. كأنها مخزن قديم اوى ..
شوفت جواها ارواح وكائنات مفزعة جدا واشكالها مختلفة ..

منهم اللى طالع من خلال ارض الغرفة زى الدخان الابيض .. ومنهم اللى بيطلع فجأة بوجه مفزع صارخ من خلال ظلام الغرفة ..

قعدت اصلى يارب ايه المكان ده .. ده مش جحيم واكيد مش فيلم رعب ..

لاقيت باقى المشهد بيبان .. شخص قاعد على كورسى .. ومربوط من ايديه فى ظهر الكرسى .. ومربوط من رجليه فى رجلين الكرسى ..

مليان جروح وخوف هائل .. وباصص للارض مرعوب ..

الرب ورانى القيود اللى رابطاه عاملة زى الثعابين والحيات ..

لكنى شوفت بداية القصة .. كائنات شيطانية واقفة من بعيد خالص خارج الغرفة .. وعمالين يعلوا صوتهم يمين وشمال كأنهم بينادوا او بيعلنوا خبر ..

صوتهم عامل زى الموجات .. شوفت صوتهم بدأ يتجمع حوالين ناس كتير اعمارهم وجنسهم واشكالهم ولغاتهم مختلفة .. وصوتهم وصل لغرف كتير مش بس الغرفة دى ..

صوتهم اتجمع حوالين بنات وحبسوا نفسهم فى خزى فى غرفهم ..

وحوالين اطفال بقوا مدمرين .. وحوالين ناس كبار فى السن وبقوا فى الارض زى الموتى .. وحوالين ناس فى مكاتبهم الفاخمة وبقوا فى انهيار رهيب ..

ومئات الناس شوفتهم .. وكلهم غرفهم باقت سوداء تماما .. وقعدوا على نفس الكرسى وباقوا متقيدين برضه ..

القيود اللى فى شكل ثعابين .. طلعت متكونة من كلمات كتير اوى من الكائنات الشيطانية اللى واقفين بعيد ..

كمل المشهد قدام عيونى .. وشوفت فى كائنات تانية ظهرت فى الغرفة .. وبدأت تهمس فى اذن الشخص ده عن قرب .. سلطانها اكبر عليه .. بدأت تجرحه جسديا وتكشف قدامه انه ضعيف ولوحده وانه لازم ها يموت .. لاقيته بدأ ينزف بسبب تجريحهم له .. وبدأ يصدقهم فبدأ نزيفه يزيد .. وبدأ يجرح هو فى نفسه علشان يموت اسرع ويهرب من عذابهم .. !!

مشهد محزن جدا جدا جدا ..

شوفت فى روحى ان كان فى نور هو كلمة الله وحقه .. وانه كان بيدخل غرف وبيفتت خامات ابليس وجنوده وقيوده وظلامه فى لحظة واحدة .. كأن كتلة نور هائلة دخلت فجأة على الغرفة .. لدرجة انك مش بتشوف حاجة من الغرفة غير النور .. وكمية شفاء مهولة بتملى الغرفة .. وبتلاقى الاشخاص شكلهم اختلف تماما من كتر الفرح والسلام والشفاء ..

وهنا اتقفلت الرؤية قدام عيون روحى .. والرؤية حكاية بدأت على الارض ولازم ها تمتد للابد ..

يارب افتح عيوننا على قيمة صوتك وكلماتك والخلاص اللى لنا فى ابنك .. لكى لا نهلك فى تعييرات الظلام ..

الفاهمون يضيئون ..