قوة علاقتنا بالرب في اعماقنا - رؤيا روحية ..

 

 من كام يوم كنت بصلى .. 

وشوفت فى روحى .. كيان مظلم وقف قدامى .. ونفخ دخان وغبار رهيب فى وشى كأنه بينفخ دخان سجاير .. بس غيوم رهيبة خرجت منه ..

الدخان والغبار ده كان قوى جدا .. حسيت بقوة اكاذيبه وشكوكه والعمى اللى ممكن يسببه .. بيقلب الدنيا فجأة لظلام دامس فى كل حاجة وفى كل الاحداث والمشهد .. لدرجة انك تشعر ان الواقع بقى ظلام وها يستمر كدة ..

ميزت فى روحى ان ده مستوى شيطانى بيحارب حرب شرسة جدا لا يعبرها الا الحقيقيين اللذين لديهم ايمان حقيقى فى اعماقهم .. ايمانهم فقط ها يبقى نورهم الوحيد وسط مساحة ضلمة هائلة .. !!

بعد كدة بشوية .. شوفت مجموعة من الناس واقفين بثبات كأنهم قادة دينيين وبيوعظوا .. وجيه برضه روح ووقف قدامهم ونفخ فى وشهم ..

وفجأة حصلت حاجة غريبة .. بدأ جزء كبير منهم .. يبقى بيدور يلمس اى حاجة حواليه كأنه بقى اعمى وبدأوا يتعثروا ويقعوا ويتكعبلوا ..

قلة اوى اللى ما تأثروش بأى حاجة خالص .. وشوفتهم فى روحى بيغمضوا عيونهم وبيبصوا على النور اللى فى اعماقهم لغاية ما كل الغيوم خلصت واختفت .. وفتحوا عيونهم وكملوا بقوة وكأن شيئا لم يحدث .. !!

وهنا اتقفلت الرؤية قدام عيون روحى ..

اجتهدوا تعيشوا حياة حقيقية بقلب صادق قدام الرب .. لان فى مستويات حروب ممكن تكسر اى حاجة جواكم غير الايمان ..

الايمان الناتج من علاقة حقيقية ومعرفة حقيقية بالرب .. هو الوحيد اللى ممكن ما يستنفذش ابدا امام ظلام ابليس ..

ورماد ابليس لا يثبت امام عيون من ينظرون الى جمال الملك وانوار سماء مجده .. ولإلهنا كل النصرة الى ابد الابدين .. امين ..