ابليس بيجتهد ان يعذب البشر .. و من الرب ينجي - رؤيا روحية ..

 فى مرة كنت بصلى .. 🙇

وشوفت كأن فى شخص واقف قدام حاجز زجاجى عملاق ..

ووراء الحاجز ده من الجهة الاخرى .. ظهر كائن مظلم شرير وقوى وملامحه مرعبة جدا .. وكان الكائن ده بيخبط وبيصرخ بقوة .. وعيونه وملامحه كانت كلها احقاد وغيظ عمرى ما شوفت فى حياتى شبهه على الارض ..

قولت لنفسى ده لو مسك اى حد قدامه مش ها يخلى منه حاجة اصلا .. !!

ورغم كل غضبه ده .. الا ان لا صوته ولا خبطه كان بيخترق حاجز الزجاج ده ..

والرب كلمنى فى حاجة مهمة اوى ..

انه بسلطانه هو حط حاجز واضح ابليس وكائنات الظلمة مش ها يعرفوا يخترقوه .. وهما عارفين كدة كويس ..

لكنهم بيبذلوا اقصى مجهود علشان يسيبوا حزنهم وكذبهم وغيظهم وخوفهم .. ولو للحظة جوانا .. علشان يستمتعوا اننا بنتعذب ولو لحظات ..

هما كائنات شريرة جدا .. وفى روحى فهمت ان ما فيش منطق او طريقة للتفاوض معاهم او لتغيير غيظهم .. هما ما لهومش ابدا صديق هما كتلة كراهية رهيبة ..

ساعتها افتكرت خدعة السحر والاعمال الشيطانية .. وكذبة انها ممكن تخلى الظلمة تكرم او تحمى حد .. لا يمكن ابدا .. ومهما استخبت الظلمة وراء ابتسامات .. ها تفضل بتتمنى تفتك بكل اللى حواليها وفى الوقت المناسب ها تفتك بيهم فعلا ..

المهم .. الرب كلمنى .. ان قبل نوال المواعيد اللى لنا منه .. سواء حياة للابد او مواعيد زمنية ارضية .. ها يكون ابليس بيبذل اقصى مجهود علشان يعذبنا .. اثناء الوقت اللى لسة ما تمتش فيه وعود الرب ..

لان ابليس عارف ان كدة كدة اللى خرج من فم الرب لازم ها يتم ..

افتكروا اوى الكلمات دى .. ابليس عارف انكم مش ها تبقوا معاه للابد .. انتوا مش فى نفس وجهته بسبب المسيح اللى فيكم ..

لكنه قبل ما تفترقوا تماما عن الارض .. ها يبذل اقصى مجهود انه يعذب اعماقكم .. لانه عارف فرح الرب اللى جاى فى السكة لكم ..

ومن يعرف الرب .. يرى كل شىء على حقيقته ..

ومن له السلطان .. هو الجالس فى محضر الرب .. وامامه تبطل قوة الاكاذيب ..ولن يعذبه الشيطان مرة اخرى بأكاذيبه للابد ..

ومن له العيون فلينظر بها يد الرب العظيمة .. امين