إلهنا ينظر إلى القلب ويشفيه - رؤيا روحية ..

 امبارح كنت واخد وقت قدام الرب .. 🙇🙇

و شوفت ارض جافة خالص لدرجة ان شقوقها زى قنوات ومسارات مالية اعماقها .. كانت ارض مستهلكة ومستنزفة لا تصلح لأى زراعة ..

لكنى شوفت ماء بدأ يدخل جوة القنوات والشقوق دى .. !! وكأنه عمل منها مسار لنفسه ..ودخل لعمق كبير فى الارض دى .. بسبب الشقوق دى ..

وبدون الشقوق دى ما كانش ها يدخل بسهولة للعمق ده ..

تحت الارض دى شوفت سبب جفافها .. بحر نار امواجه رهيبة هو اللى منشف الارض دى .. وكان جوايا انه مشاعر وذكريات واحداث ماضى .. بحر كله من الماضي ..

لكنى شوفت المياه نجحت تمشى فى الشقوق دى .. وما اتبخرتش .. صمدت وكملت قصاد قوة بحر النار ده ... دى كانت مياه مختلفة مياه حية قوية وثابتة .. ونزلت تطفى النار دى ..

القصة تبان انها بتاخد وقت طويل .. لان النار كبيرة زى البحر فعلا بنفس شكل امواجه رايحة جاية ..

لكن الرؤية دى بتوصف تعاملات الرب معانا .. وانا معرفش الرب يخلص بحر كل واحد فى وقت اد ايه ..

لكن الجميل .. انه بيعلن انه شغال اوى .. ايوة مياهه هو كانت اقوى كانت مليانة قوة وثبات كأنها متدعمة دايما ..

بصدق ان الرب عينه على مناطق وجع فى اعماقنا وظروفنا .. مناطق بتسبب ألم ومرارة دائمة .. وبيطلعها وبيعينها بعلامة امامه .. علشان يطفيه..

ايوة ها نصدق فيه هو .. بفتكر الاية .. بالإيمان اطفأوا قوة النار ..

الرب بيكشف ظروفنا وحياتنا فى نطاقه المعجزى .. تمام زى ما روح الرب كان بيرف حوالين الارض الخربة والخالية بيعلن مسئوليته عن احداثها كلها فى ملكوته .. ايوة ها تبدأ المعجزة ها تبقى فى نطاق عمله .. منطقة عمل الرب ..

ايوة الأرض اللى فى الرؤية هى جدران قلوبنا والبحر النار جواها .

اما الرب فينظر الى القلب .. فيه شفاء .. الشفاء جميل .. وده حقنا جوة الرب الشافى ..هلليلويا بصدق ان هو بيده كل امرنا .. ومسرته فى حياتنا تنجح .. 💪💪💪