لكل شخص متألم في ظروف صعبة - رؤيا روحية ..

 الصبح كنت بصلى علشان حد بيمر فى ظروف صعبة جدا .. 🙇

وشوفت المسيح لابس لبس نجار .. ومشمر اكمامه وبنطالونه ..

وماسك فى ايده اطار الباب اللى بيبقى راكب فى الحيطة ( الحلق يعنى ) ..

وكان قاعد فى تركيز شديد بيفك حلق الباب بالشاكوش .. وقعد يظبطه على ترابيزة النجار .. ويخبط عليه يمين وشمال .. ويهبد عليه بإيده ..

لغاية لما عدله وبدأ يمشى عليه ايده .. ويبص له من كذا زاوية .. لغاية لما اتأكد انه تمام مظبوط ..

وبدأ يركبه فى الحيطة .. ورجع من بعيد يبص عليه علشان يتأكد ان الحلق ده معدول فى الحيطة كويس ..

ساعتها فهمت ليه مرات بتحصل احداث فى حياتنا غير متوقعة وموجعة جدا او خارج احلامنا وطموحتنا ..

لو الحلق ده فضل يحلم انه يبقى حلق باب فى قصر .. عمره نا ها يعرف انه متعوج ومايل .. وانا باب القصر ها يكسره تماما وها يتدمر ويترمى حطب للنار وتضيع قيمته ..

ولازم فجأة النجار يتدخل .. ويفكك الحلق ده .. ويدخل بأحداث تقطع تسلسل احلام الحلق ده .. ويبدأ النجار يعدله .. وساعتها ها يصرخ وها ينألم وها يحس بظلم وقسوة النجار .. ويمكن يفتكر ان النجار ما بقاش فاهم حاجة ..

لكن الحقيقة ان النجار شاطر اوى وفاهم اوى .. واللى بيعمله هو اللى ها يخلى الحلق ده يبقى حلق فى قصر ملك الملوك ..

الرؤية خلتنى كمان استمتع بفكرة ان المسيح كان على الارض مهنته نجار ..

يارب بصلى تنفتح عيوننا .. ونقبل ايدك ومحبتك حتى لو مش فاهمين كل حاجة انت بتعملها .. لكن بالايمان نقبل انك صالح جدا ومش بتعمل غير الصالح من جهتنا ..

شكرا من اجل الالم والخبط بقوة فى حياتنا ..

اذكر المتألمين يارب اللى احنا منهم .. والشخصية اللى بسببها ارسلت الرؤية .. امين .. 🙏🙏