يفتقد الارواح التي في سجنها - رؤيا روحية ..

 النهاردة الصبح كنت بصلى .. 🙇🙇

وشوفت ناس قاعدين فى منطقة مظلمة تماما .. وكانوا قاعدين جوة مقطرة وبيتعذبوا .. فى منهم اللى كانت جروح مالية جسمه .. واللى عنده تمزيق واضح او فقد لأجزاء من جسمه ..

ولاقيتهم فى هذه الحالة لزمن طويل جدا جدا .. وعرفت فى روحى ان ده مكان من الجحيم .. كانوا بيحاولوا يخرجوا لكنهم مهما حاولوا سلاسلهم ما كانتش بتتفك .. وكانوا بيخبطوا فى حاجز غير مرئى وبيتوجعوا اكتر ويرجعوا فى يأس ودموع فى اماكنهم ومرارة ندم رهيب ورعشة برد فى ظلام واهمال دائم .. كانوا فعلا جوة سجن لا يمكن الخروج منه للابد ..

لكنى فجأة شوفت ايد الرب بتعدى فوق الحاجز غير المرئى ده .. وبتاخد ناس منهم بيتنهدوا وطالبين الرب ..

كان حاجز مستحيل عبوره .. لكن الرب عرف يخطفهم ويطلع بيهم فوق الحاجز ده ..

ساعتها شكرت الرب جدا .. لانى اكيد كنت مع الناس دول .. ولولا ايد الرب ما كانش ممكن اكون برة المنطقة دى ..

ايوة هو الوحيد اللى جيه وعمل زيارته لأرواح كانت فى السجن .. واكيد انا واحد من الارواح دى ..

بشكرك يا إلهى لانك افتقدتنى ومازلت بتفتقدنى وبتخلصنى مما لا استطيع انا ان اخرج منه .. نعم انت يهوه الذى يخلص شعبه من خطيتهم .. انت يسوع .. ❤