روح التسلّط ..!!

 

 

 

من اكتر الامور المرعبة اللي قابلتني في حقل الخدمة .. 

ان روح التسلّط بدأ يعمل بنشاط في محاربة ملكوت الرب من خلال الاختباء خلف غلاف و ستار المحبة الخادعة الغير حقيقية و التي ليست من روح الرب ..

يعني ممكن تلاقي شخص شكله الخارجي مليان روح محبة .. لكنه مليان في اعماقه بروح التسلط ..

فيسلب الاشخاص دعوتهم بتسلط شكل محبة ..

انا خايف عليكم .. خليكوا هنا جنبي .. و احنا مع بعض ها نبقى اقوى .. او و احنا مع بعض ها ننال مواعيد .. او و احنا مع بعض مش ها نبقى في تشويش ..  او و احنا مع بعض ها تحصل النهضة ..

ما ينفعش تبقوا معايا و مع حد تاني او مع فلان او او  

و يراقب تحركات الكل مش بمحبة لكن بتسلط .. و لو شاف حد منهم قرر حتى يقول امين او مجداً للرب في اي مجتمع اخر .. 

يلمح له .. او يواجهه .. او يتجاهله .. او يبطل يصلي معاه .. او او او   من الامور اللي فيها قهر و تجويع و تعطيش ..  علشان الشخص يستسلم بسرعة .. 

ازمة المتسلط .. انه بيجيد التسلط يعني عنده سلطان بسبب روح التسلط .. فيقدر يأثر بمشاعر قوية على اللي قدامه .. فيخافوا من دموعه او حزنه او كلمات عتابه .. او حتى ينهاروا قدام كلمات تشجيعه و محبته ت تدليله لهم او مواعيده اللي شبه مواعيد الرب  او اجواءه اللي شبه أجواء الرب .. 

او يستخدم مصطلحات او لغة خاصة بيه سواء برة الكتاب المقدس او حتى لو من الكتاب المقدس نفسه .. علشان يظهر  انه داخل لمناطق اعمق في الملكوت و الاعلان او اقوى من الاخرين .. فبرضه يسيطر على الآخرين اللي مش لاحقين اصلا يكبروا مع الرب .. 

و المرعب ان روح التسلط بيؤيده بقوة و ممكن عجائب .. و ده ظهر في النبي الكذاب لما بقى بيخضع الناس العجائب ليسجدوا للوحش .. !! 

و ممكن يعملهم عشرات الاحداث و الجروبات و التجمعات و يوفر لهم تسديد احتياجات ظاهري .. كل حاجة حابينها ماشي ..

لا يعارضهم لتقويم ايمانهم او تبكيتهم .. شايف عيوبهم و عدم نضجهم و سايبهم عادي .
مش مهم .. المهم انهم بتوعه معاه علطول ..

روح التسلط مرعب .. لانه بيفصلك عن مشيئة الرب لحياتك .. و ممكن ده لوحده .. يسلب زمنك و ارتباطك و خدمتك و مسحتك و مستقبلك . وعلاقات تحررك و تبنيك جوا الملكوت ..  و حاجات كتير  كان ممكن تمتلىء حياتك بيها ..

------------------------

و انا ببص جوة الكتاب المقدس .. 
بكتشف رغبة ابليس الواضحة في التحكم و السيطرة على الاخرين .. 

و هو لا يتراجع عن هذا التوجه لان أعماقه متشوهة و مريضة بسبب الانفصال عن محضر الرب .. 

و الحقيقة التسلط له اقنعة كتير لما تفحص الكتاب تترعب .. 

التسلط ممكن يكون في شكل  .. 

خداع .. 
كورنثوس الثانية ١١ : ٣
وَلكِنَّنِي أَخَافُ أَنَّهُ كَمَا خَدَعَتِ الْحَيَّةُ حَوَّاءَ بِمَكْرِهَا، هكَذَا تُفْسَدُ أَذْهَانُكُمْ عَنِ الْبَسَاطَةِ الَّتِي فِي الْمَسِيحِ.

تملّق  .. 
المزامير ٣٦ : ٢
لأَنَّهُ مَلَّقَ نَفْسَهُ لِنَفْسِهِ مِنْ جِهَةِ وِجْدَانِ إِثْمِهِ وَبُغْضِهِ.
الامثال ٦ : ٢٤
لِحِفْظِكَ مِنَ الْمَرْأَةِ الشِّرِّيرَةِ، مِنْ مَلَقِ لِسَانِ الأَجْنَبِيَّةِ.

و ده يشبه الاغواء و السحر اي التأثير على توجهات البشر  بقوة شريرة .. 
اغواء سحر 
غلاطية ٥ : ٢٠
عِبَادَةُ الأَوْثَانِ سِحْرٌ عَدَاوَةٌ خِصَامٌ غَيْرَةٌ سَخَطٌ تَحَزُّبٌ شِقَاقٌ بِدْعَةٌ

و كذلك العرافة هي تسلط .. 
حزقيال ١٢ : ٢٤
لأَنَّهُ لاَ تَكُونُ بَعْدُ رُؤْيَا بَاطِلَةٌ وَلاَ عِرَافَةٌ مَلِقَةٌ فِي وَسْطِ بَيْتِ إِسْرَائِيلَ.

غلاطية ٥ : ٢٠
عِبَادَةُ الأَوْثَانِ سِحْرٌ عَدَاوَةٌ خِصَامٌ غَيْرَةٌ سَخَطٌ تَحَزُّبٌ

اخدت بالك من تواجد التحزب مع السحر و الغيرة  . .
شِقَاقٌ .. !!
التحزب و الشقاق هما تسلط ..  يعني ياخد ناس بعيد عن الجسد الروحي السليم اي الملكوت و يحبسهم معاه .. 

و ده ظهر هنا محاربة بولس الرسول .. بروح تسلط بينادي بخلاص المسيح ..
فيلبى ١ : ١٦
فَهؤُلاَءِ عَنْ تَحَزُّبٍ يُنَادُونَ بِالْمَسِيحِ لاَ عَنْ إِخْلاَصٍ، ظَانِّينَ أَنَّهُمْ يُضِيفُونَ إِلَى وُثُقِي ضِيقًا

------------------------

بفتكر يربعام و بعده ايزابل  ..  اللي عملوا عبادات بديلة عن عبادة الرب يهوه .. بسبب رغبتهم في التسلط على الشعب .. 

لو انت خادم او خادمة او منظومة او مؤسسة .. 

احذر احذر احذر ..

لان كل مرة ها ترغب في التسلط .. و ها تحاول تاخد سلطان مش لك من الرب على الاخرين .. ها تكون بتحط ايدك في ايد الشرير .. و بتدخل كمية حروب و انواع امراض روحية على الجسد الروحي ده .. 😭

يعني انت كدة ها تتسبب في ضرب الجماعة بروح تحزب و انشقاق او زنى روحي او ها تخضعهم كلهم لسلطة عرافة و ليس روح الرب  .. 😭

احذر لان مثل هذا دينونته عظيمة .. 😭

------------------------

صلي معايا من اجل التحرر من قبضة روح التسلط .. 

يا يسوع اشكرك لانك احببتني بمحبة غامرة لشفاء حياتي .. و لإطلاق روحي معك للابد .. 

انا بقبل خلاصك و موتك بدالي ..  بقبل ذبيحتك الكاملة .. 

بعلن انك الرب و السيد و المخلص لحياتي .. 

بصلي ان قوة روحك القدوس تعمل في اعماقي و علاقاتي .. و تطلقني من تحت قبضة روح التسلط .. 

في اسم المسيح لا يكون اعاقة او سلب او تعطيل لدعوتك و مشيئتك في حياتي بسبب روح التسلط .. 

اشكرك لانك تختار نصيبي و تحدد ميراثي الروحي و الزمني .. 

اجمعني بعلاقات لبنياني لا للتسلط عليّ و استهلاكي و سلبي .. 

نعم كل عظم الى عظمه في حياتي من يدك ايها الرب .. 

نعم علاقات امنة و مقدسة بيدك .. 

في اسم المسيح شفاء لي من اثار التسلط .. و اطلاق للابد .. امين ..

------------------------

نصلي صلاة جماعية من اجل مصر و العالم .. 

ان نار روح الرب .. روح القضاء و الاحراق .. من خلال ذبيحة ايليا اي ابناء الرب الخاضعين .. 

تدين  و تفضح ..  روح التسلط و سلطة ايزابل النجسة المدمرة مع كل انبياءها .. 

اؤمن اؤمن اؤمن .. في اسم المسيح .. امين ..

------------------------

للوصول إلى باقي التحذيرات .. برجاء الضغط على الرابط التالي .. 👇

#elohiym_image_خطورة_و_مجازفة_في_العالم_الروحي