لكل شخص خدمته بسيطة وغير ظاهرة ..

 لكل شخص خدمته بسيطة وغير ظاهرة ..

ابسط خدمة بتعملها و انت مدعو لها من الرب وخاضع .. بتكون مؤثرة جداً جداً جداً في ملكوت الرب ..

من فترة في اشخاص كتبوا ان اللي بيخدموا على الانترنت دول في واقع افتراضي و ما يفتكروش نفسهم بيعملوا انجاز .. او بيسخروا دعوة الرب لمصالحهم او لمجدهم .. !!

خلوني اقولكم اللي بيخدم على الانترنت خدمة حقيقية بيواجه ايه .. ؟!!

اولاً .. ما حدش بيدعمه مالياً بشكل مباشر زي حضرتك يا اللي بتقف على منبر و الناس بتشوفك و بتقرر تدعمك او ملزمة تجامل مشاركتك لهم .. او بيكون لك راتب من هيئة او نظام معين انت تابع له ..

فاللي بيخدم على الانترنت بيواجه ظروف اصعب منك بكتير وقد يكون بيشتغل ساعات طويلة علشان يدخل ربع دخلك لبيته وحياته وبرضه بيخدم الرب بفرح واستمتاع ربما اكتر منك ..

ثانياً .. ما حدش بيدعمه كتير نفسياً .. يعني ما فيش حواليه مجموعة من الناس فرحانين وبيصقفوا له او معاه و لا بيتصور كتير معاه .. و لا بيتصور لايڤ او فيديوهات على منابر ..

بل كل اللي بيقتربوا منه .. هما فعلاً اناس محتاجين الرب وعندهم مشاكل رهيبة وقيود اتفرضت على حياتهم من الظلمة و حروب من ارواح شريرة او سحر او عرافة او عبادات شيطانية ..

وعلى الارجح دول لو لجأوا ليك ها تقول عليهم مرضى نفسيين او فيهم مشكلة او ها تصرفهم بعيد عنك او تعتبرهم لا قيمة لهم في القصة او ربما مصدر نكد للتصقيف اللي حواليك ..

رغم انهم على فكرة ابطال بشكل مذهل وصمدوا وطلبوا الرب في ظروف هائلة الظلام والتدمير وعلى فكرة عندهم ايمان ومسحة لو طلعوا على منبر وقالوا كام كلمة من اختباراتهم ها تلاقي سكيب من نار الرب فوقيهم قد تكون ما شوفتهوش قبل كدة ..

فإنت لو واجهت كل ده احتمال ما تخدمش ..

ثالثاً .. لكل امر تحت سموات الرب وقت .. يا باخت كل واحد بيخدم خدمة بسيطة في المشيئة تقييم الناس الغير مبصرين لها انها خدمة ضعيفة ..

لان الرب في وقته ها يطلقكم لخدمات عظيمة ان كانت الخدمات دي جزء من دعوته لكم .. و كملوا حتى لو في الخفاء لان الرب يرى القلب .. حتى لو خدمتكم فرد واحد فقط في الخفاء ..

في الابدية قصص مذهلة لعمالقة صنعهم الرب ولم تعرفهم الارض .. روائح تضحياتهم في صمت هي بخور مرهب و مجيد في محضر إلهنا وملائكته ..

نعم .. الامين في القليل .. لازم ها يقيمه العادل الحق على الكثير .. مجداً للرب 💥🙇🏻‍♂️