الرب يقف وينتظرك - رؤيا روحية

 من شوية كنت بفتكر مواقف لومت فيها الرب انه مش بيشيل العوائق اللى قدامى واللى انا بحس ان فيها ظلم لى .. 

فشوفت فى روحى انسان بيتحرك جوة متاهة كبيرة اوى اوى اوى .. وعمال يتخبط فى جدرانها وقوته بتضعف .. لكن الرب كان بيجى و بيشاور له بإصبعه على منفذ جديد للخروج .. 

الشخص ده دايما كان بيشوط ويخبط فى الحوائط والجدران بغيظ كأنه بيلوم الرب بشكل مستمر .. 

بينما الرب كان مازال بيشاور بإصبعه على منفذ جديد للخروج ..

وكان الرب بيكلمنى .. ان ابليس بيملى الناس باللوم والمرارة تجاه الرب تحت اى مسمى .. او لسبب انه مش بيزيل العوائق .. 

لكنهم ما يعرفوش انه اصلا بيحاول يفصلهم عن الرب .. لان فقط وجود الرب معاهم ها يساوى الخروج من العوائق والمتاهات حتى لو ما اتشالوش .. 

لان الرب هو المنفذ الوحيد فى قصتهم .. الرب هو الباب الوحيد لنجاتهم ..

واتقفل المشهد البسيط قدام روحى .. وسابنى فى حالة من الراحة والشفاء ..

لانى فهمت .. انا مش محتاج ازالة عوائق .. انا محتاج الرب .. وهو ها يعرف بعدله ينجى نفسى وينصرنى .. 

بصلى ان الرب يتوب قلوب الكل ليخرجوا من سجن المرارة والعبودية لإبليس .. 

لان الرب جبار يخلص .. فهل هناك احد يسمع صوته ويفتح له الباب فيخلص .. ؟؟!! 

توبنا ونقينا يارب لنفرح معك الى الابد امين 🙏