قيمة الكرازة بكلمة الرب و حرية اختيار كل شخص للحياة الابدية او الهلاك الابدي - رؤيا روحية ..

 

الصبح قومت وشوفت المشهد ده .. انا مش عارف ده حلم ولا رؤيا ..

المهم .. شوفت ارض كأنها صحراء او برية .. مليانة حجارة ورمال وفاضية من اى حياة ..

وفجأة المشهد بقى من بعيد .. وشوفت الارض دى عليها ناس متفرقين فى كل مكان .. وكل واحد فيهم كان مربوط فى رجليه ثقل كأنه صفيحة حديد ثقيلة اوى ..

فى منهم اللى شوفته بيحاول يطلع ناحية السماء .. لكن الثقل كان بيثبته فى الارض ..

لكنى شوفت ناس من كتر ما عضلاتهم باقت قوية وهما بيحاولوا يطيروا .. بدأوا فعلا يطيروا بالثقل ده .. لغاية ما وصلوا لمنطقة فى السماء .. وقع منهم الثقل .. وطاروا لغاية ما اختفوا من قدام عينى ..

وشوفت برضه ناس تانيين .. كانوا ماشيين على الارض مش رافعين عيونهم للسماء .. فضلوا ماشيين .. وكل فترة الثقل بتاعهم يشدهم لتحت الارض .. ينزل بيهم شوية وهما مش حاسين ..

لغاية ما بدأوا يتكيفوا مع الثقل .. وينزلوا معاه لتحت لدرجة انى شوفت منهم ناس بدأت تغوص لتحت بإرادتها كأنهم بيعوموا بس فى رمال ..

وفضلوا يعوموا والثقل يدفعهم .. لغاية ما وصلوا لنقطة بقوا هما بيشدوا الثقل لتحت برغبتهم .. كانوا متشوهين فى شكلهم .. شكلهم اتغير وبقى مليان عضلات بس بقوا زى الوحوش .. لغاية ما وصلوا لهوة عظيمة كلها حرارة رهيبة ونار لا تنتهى ..

عايز اقول ان فى ناس عددهم قليل من اللى فى عمق الرمال .. سمعوا صوت او حاجة لفتت انتباهم .. وماليتهم بالقوة .. وخليتهم ياخدوا اتجاه عكسى تاني وده كان صعب اوى .. لكنهم نجحوا وخرجوا بالثقل لسطح الارض .. وكانوا متألمين جدا وبيبكوا وينوحوا بعويل ووجع رهيب ..

لكنهم بدأوا يبصوا للسماء ويبصوا حواليهم ويشوفوا ناس بيحاولوا يطيروا .. وبدأوا بتشجعوا لغاية ما طاروا زيهم ..

وهنا اتقفلت الرؤية قدام عيون روحى ..

العالم مهما كان وضعه وجماله .. مازال برية مقارنة بالسماء وروعتها او مقارنة بالجحيم وشر هلاكه ..

لابد من اعلان كلمة الله ومشاركة الناس بأخبار الخلاص لان ده هو اللى ها يخليهم يتوبوا وفعلا حياتهم تتغير تماما ..

يوجد رجاء دائما .. ويوجد شفاء ..

للسماء سلطان وللجحيم سلطان .. وانت من تختار لمن تخضع ولمن ستكون ..

الالام والظروف اثقال شديدة .. ولكن يوجد من ترفعه السماء .. ويوجد ايضا من يقبل ان يتشوه و تبتلعه الجحيم ..

ومن يكتمل امتحانه يتبع وجهته ..

يارب افتح عيوننا واطلق افواهنا لكى لا نهلك ولا يهلك من حولنا فى تعييرات الظلام .. بل نكون مشفيين وشركاء فى مجدك للابد .. 🙏🙏