خدمة بلا منبر ..

 خلال ال ٣ سنين اللي فاتوا .. كنت متوقف عن اي خدمة على منبر ومازلت .. و كنت بعمل كدة و انا مستمتع بالرب جداً وخاضع لاني مدرك ان لسة وقت الجزء ده ما جاش .. 

وخلال الوقت ده كان الرب بيوريني انواع خدام غير ظاهرين كتير اوي في ملكوته ..

شوفت ناس ممكن يصوموا ويصلوا ان الرب يشددني من غير ما يعرفوني ويعملوا كدة مع ناس كتير ..

شوفت ناس بينتظروا امام الرب علشان يحملوا كلام نبوي على حياتي .. 

شوفت ناس ممكن ما لحقش ارد عليهم ويكلموني كذا مرة بلا حزن او ضيق علشان يبلغوني تشجيع من الرب وبيبقى في وقته ..

شوفت ناس بتعطي الرب من اعوازها وبدون ما حد يعرف .. 

شوفت ناس بتروح تسافر مسافات علشان تودي حاجة معينة لأسر فقيرة وبتبقى حاجات قيمة مش عندهم هما اصلاً في بيوتهم .. و برضه من غير ما حد يعرف ..

شوفت اللي ضحوا براحتهم او ببيوتهم علشان يفتحوها لناس تيجي تاخد مشورة ويكلموهم بأي آية من الكتاب تفرق معاهم ..

شوفت ناس بتبكي بالساعات من اجل عمل الرب وماحدش يعرفهم .. 

شوفت اللي بيروحوا يطبطبوا على حد رغم انهم شبعانين طعنات من اقرب الناس لهم ..

شوفت اللي بيعملوا اكل ويروحوا يقدموه لأسر فقيرة ويشاركوهم الوقت .. 

وعشرات الخدمات شوفتها .. وكل دول لا كانوا بيطلعوا على منبر ولا حد يعرفهم ولا حد بيصقف لهم ولا حد بيدعمهم .. وبيشتغلوا وبيكافحوا واحيانا دخلهم مش بيكمل والرب هو اللي بيسندهم ..

المُحزن بقى انك تلاقي اللي بيقفوا على المنبر او درسوا دراسة كتابية او معاهم موهبة للعزف او التسبيح .. هما اللي بيحكموا على الناس الامناء الغير ظاهرين .. انهم ناس غير فعالين في الملكوت او انهم ناس مغرورين او كسالى ومش عايزين يضيفوا للملكوت .. او مش جذابين مش لازم نقف معاهم ..

باقينا بنشوف اللي على اي منبر او قدامه مايك ان الرب مباركه .. والباقين مالهومش اصلا وجود ..

لما نوصل السما ها نكتشف العجائب هناك .. في ناس فعلاً سيرتهم مالية السما وماحدش هنا سمع عنهم .. 

الرب يفتح عيوننا ولا نحكم على احد .. قد يكون اللي بنحكم عليهم الرب بنفسه بيقول ياريت تبقوا شبههم .. 😭😭